„Íþróttabærinn”

Um 30 manns voru við borðið þegar mest var en auk þess komu fleiri þáttakendur að borðinu og stöldruðu þar við um stund. Nokkuð jöfn skipting var á milli kynja og aldurshópa en fá börn.
Flest svæði sem rætt var um í hópnum voru auðkennd á uppdrætti með númeri, listi yfir aðstöðu og athafnir sem hópnum þótti ábótavant ásamt hugmyndum um úrbætur og notkun svæða voru einnig færð inn á uppdráttinn. Númer á þeim svæðum sem talið var að rúmað gætu uppbyggingu á viðkomandi aðstöðu var sett fyrir framan aðstöðu/athöfn. Sem dæmi þóttu svæði númer 6 ákjósanleg fyrir smábátahöfn, aðstöðu fyrir frjálsar íþróttir mætti byggja upp á svæðum númer 1, 2, 4 og 5 og akstursíþróttum mætti koma fyrir á svæði númer 8.
Þátttakendur skiptust upphaflega í tvær fylkingar í afstöðu til Akureyrarvallar. Þegar sú skoðun kom fram að á vallarsvæðinu mætti koma fyrir hlaupabrautum, góðri gönguleið um svæðið og áningar- eða leiksvæði var eins og afstaða þeirra sem fyrr höfðu viljað völlinn burt og gönguleiðir og fjölskyldusvæði í staðinn breyttist. Fólk var sammála um að staðsetning Akureyrarvallar gagnvart öllum íbúðarhverfum bæjarins styrkti stöðu hans fyrir gangandi vegfarendur og nálægð vallarins við miðbæinn kæmi með aukið líf í bæinn og styrkti starfsemi þar. Auk þess væru aðstæður við völlinn ákjósanlegar, skjól fyrir áhorfendur og einfalt að koma upp útisviði og aðstöðu til hljómleikahalds, skemmtana og sýningahalds á vellinum.
Skátagil var talsvert í umræðunni, flestir vildu tengja gilið betur við göngugötuna og þar komu einnig fram hugmyndir um útisvið eða ,,settröppur” neðst í brekkunni. Brettasvæði var eitt af því sem fólk vildi sjá í Skátagili og talaði um að færa eða lyfta núverandi göngubrú yfir gilið til að bæta aðstöðu til brettaiðkunar þar.
Rætt var um Hamrakotstún og litla notkun á því svæði, það komu fram hugmyndir um að hafa þar grillaðstöðu.
Fólki fannst svæði neðan við sundlaug, andapollurinn ekki nógu aðlaðandi og þurfa andlitslyftingu. Þar þyrfti að vera góður áningarstaður með góðum bekkjum og hugsanlega einhverri aðstöðu fyrir börn.
Margir tjáðu hugmyndir og óskir um betri tengingu við hafnarsvæði og að þar vantaði tilfinnanlega aðstöðu til að dorga eða setjast niður og horfa yfir Pollinn. Lækkun umferðarhraða og aðgerðir til að bæta aðgengi gangandi vegfarenda að strand- og hafnarsvæðum voru meðal þess sem fólk vildi sjá við Glerárgötu og Drottningarbraut.
Þegar leið á vinnuna við skipulagsborðið komu fram tillögur og hugmyndir að notkun fleiri svæða , m.a. hugmynd um að setja landfyllingu austan við núverandi Drottningarbraut, sjá nr.5 á uppdrætti og flytja veginn yst á landfyllinguna (sjávarmegin). Með þessari aðgerð skapaðist rými fyrir m.a. aðalleikvang, frjálsar íþróttir, fimleika, tennis og badminton, keiluhöll, brettasvæði og fleira. Svæðið neðst í og neðan við brekku við Lystigarðinn væri stórt, sólríkt og skjólgott og því ákjósanlegt fyrir fjölmenn áhorfendasvæði/ stúku í þessu samhengi.
Hugmyndir varðandi fjölbreyttari notkun á Pollinum voru margar, flestir töldu aðstöðu fyrir skemmtiferðaskip of fjarri miðbænum og því væri upplagt að byggja viðlegukant fyrir þau við nýja landfyllingu (nr.5). Góð smábátahöfn var eitt af því sem nefnt var sem ákjósanlegur kostur fyrir lífið í miðbænum.
Númer svæða eru færð nokkuð nákvæmlega inn á uppdráttinn þó t.d. svæði númer 9, þar sem hugmyndir eru um að byggja reiðhöll sé ekki nákvæmlega staðsett.

1. Glerárskóli, Glerársundlaug, Boginn, íþróttasvæði Þórs
2. Akureyrarvöllur
3. Lundaskóli, svæði íþróttafélags KA
4. Skautahöll
5. Hugmynd um landfyllingu
6. Hugmynd um staðsetningu smábátahafnar
7. Skátagil
8. Svæði fyrir akstursíþróttir, rally cross og snjósleða
9. Hugmyndir um staðsetningu reiðhallar (ónákvæmt)
10. Sundlaug Akureyrar
11. Hugsanleg staðsetning brettasvæðis
12. Verksmiðjuhverfi, möguleiki á nýtingu húsnæðis fyrir keiluhöll
13. Síðuskóli

Ljósmynd: Þorgeir Baldursson