„Grænar leiðir I”

Byrjað var á því að fara í gönguferð um miðbæinn til að líta á grænu svæðin sem þar eru. Þátttakendur voru sammála um að frekar ætti að leggja áherslu á gæði grænu svæðanna en umfang þeirra.
Fyrst var staldrað við Andapollinn. Þar mætti laga kantinn og bæta aðgengi. Hugsanlega mætti hækka vatnsborðið og stækka þannig tjörnina, þá yrði heldur ekki eins bratt að henni. Girðingu mætti fjarlægja og leggja stíg við vatnsborðið.
Skátagil þyrfti að laga og gera það að góðum viðkomustað allt árið. Á sumrin myndi fagur gróður og bekkir laða að en aðstaða fyrir snjóbretti á veturna. Ef göngubrú yfir gilið væri hækkuð mætti renna sér undir hana. Tengja mætti Skátagil þvert yfir göngugötu og inn á torg bak við Skipagötuhús. Þá þyrfti að rífa eitt hús.
Á Ráðhústorgi gæti verið skautasvell á vetrum og þar mætti flytja tónlist.
Rætt var um að grænu svæðin ættu að vera vettvangur útiveru fyrir fjölskyldur með göngustígum, skíðabrautum, leiktækjum, brettapöllum og brekkum fyrir snjóbretti og sleða.
Bæta þyrfti göngutengingar miðbæjar við önnur svæði, einkum Glerártorg. Lystigarðurinn gæti teygt anga sína niður í miðbæ með einhverjum hætti, t.d. með litlum beðum eða görðum sem skírskota til þess stóra. Tjaldstæðið mætti laga og bæta þar við gróðri.
Þátttakendum var almennt ekki vel við háshýsi, þeim fylgi vindstrengir, mikil breyting á bæjarmyndinni og skuggi.
Bæta mætti lýsingu almennt í miðbæ, sérstaklega á Ráðhústorgi. Yfirbragð mætti vera hlýlegra, jafnvel hafa gróður í færanlegum pottum og þá mætti breyta staðsetningu eftir þörfum.