„Milli fjalls og fjöru”

Á þessu skipulagsborði var lögð áhersla á að ræða um íþróttir, umhverfi og útivist. Heldur færri voru í þessum hóp en hópnum um “Íþróttabæinn” en meiri hreyfing var á fólki og margir kíktu við þó þeir stæðu stutt við.
Innbyrðis stígatengingar milli íþróttasvæða, skóla og íbúðasvæða var rædd og nauðsyn þess að slíkir göngu-/ hjólastígar væru auðfarnir og öruggir. Merking gönguleiða, útgáfa gönguleiðakorta og fjölgun bekkja og áningarstaða við gönguleiðir var meðal þess sem fram kom að gæti aukið notkun þeirra. Tenging gönguleiðanna við miðbæjarsvæði myndi óhjákvæmilega auka líf í miðbænum.
Margir lýstu ánægju sinni með stíg sem liggur frá Glerárskóla/íþróttasvæði Þórs að Lundaskóla/íþróttasvæði KA. Stígurinn liggur um fallegt opið, er öruggur og tengir saman stór svæði. Áhersla var lögð á að sambærilegur stígur yrði lagður niður með Glerá að Glerártorgi, framhjá Akureyrarvelli, tengjast gönguleiðum í miðbænum og þaðan áfram inn með Fjörunni, Búðargili, að Skautahöll og að Kjarnaskógi.
Nokkrir ræddu um að tenging Dalsbrautar við Naustahverfi væri óþörf og að mikilvægara væri að halda svæðinu sem ætlað var fyrir vegstæði opnu og leggja um það stíg frá Lundaskóla að golfvallarsvæði og tengjast þannig fjölbreyttum útivistarsvæðum og gönguleiðum við golfvöll, nýtt tjaldsvæði við Hamra og stígum í Kjarnaskógi.
Ósk um gönguleið meðfram sjónum frá flugvelli, meðfram miðbæ og niður á hafnarsvæðið var skýr og kom oft fram. Fólk talaði um mikilvægi þess að leggja göngu-/hjólaleið að Krossanesborgum og að einnig vantaði stíg frá Hlíðarbraut upp með Glerá. Margir ræddu um að strætóferðir ættu að vera á skíðasvæði í Hlíðarfjalli og frá skólum að öðrum íþróttasvæðum bæjarins og milli þeirra. Hugmynd kom fram um ylströnd í kverkinni við Leiruveg, (númer 1 á uppdrætti) og fékk hún góðar undirtektir.