Markmið og þátttaka
Markmið opins þings um miðbæ Akureyrar var að fá upplýsingar um hugmyndir íbúa Akureyrar um möguleika í þróun miðbæjar við undirbúning alþjóðlegrar hugmyndasamkeppni. Aðstandendur Akureyrar í öndvegi töldu mikilvægt að forsendur keppninnar væru í samræmi við hug íbúa til þess að tryggja að afrakstur keppninnar væri bæjarbúum að skapi.
Í sama tilgangi höfðu verið haldnir samráðsfundir á undan opna þinginu með þrengri hópum hagsmunaaðila.
Opna þingið var haldið í Íþróttahöllinni á Akureyri laugardaginn 18. september 2004. Mikil aðsókn var að þinginu enda höfðu aðstandendur Akureyrar í öndvegi gengist fyrir umfangsmikilli kynningu á þinginu og markmiðum þess vikurnar á undan. Þátttakendur fylltu út seðla þar sem spurt var um aldur, kyn og búsetu. Alls voru fylltir út 1450 seðlar en þátttakan dreifðist nokkuð yfir daginn og að jafnaði voru um 2-300 manns í húsinu. Gerð er nánari grein fyrir þátttöku í kafla 2.5 hér á eftir. Niðurstöður voru kynntar á fundi í sal Menntaskólans á Akureyri, Hólum, miðvikudagskvöldið 22. september.
Reynt var að tryggja þátttöku sem flestra þjóðfélagshópa, t.d. var þingið sérstaklega kynnt fyrir háskólanemum og börn í grunnskólum og leikskólum tóku þátt innan skólanna fyrir þingið en niðurstöður þeirra voru kynntar á þinginu.
Þátttakendur skrá sig á íbúaþingið.
Skipulagning opna þingsins
Undirbúningur fyrir opna þingið hófst snemmsumars 2004 jafnframt undirbúningi alþjóðlegrar hugmyndasamkeppni um miðbæinn. Tímasetningar voru ákveðnar þannig að niðurstöður þingsins og annarra samráðsfunda lægju fyrir þegar lokið væri við gerð keppnislýsingar en keppnin hefst í byrjun nóvember 2004.
Sjálfseignarstofnunin Akureyri í öndvegi kostaði íbúaþingið og naut aðstoðar og velvildar fjölmargra aðila, einkum bæjarstjórnar og fyrirtækja sem lögðu málefninu lið. Gert var samkomulag við Akureyrarbæ um að bærinn legði til ýmis gögn, aðstöðu og starfskrafta.
Í aðdraganda þingsins voru haldnir samráðsfundir með aðstandendum Akureyrar í öndvegi, embættismönnum bæjarins og ýmsum hagsmunaaðilum. Þessir fundir fóru fram með líku sniði og opna þingið sjálft en opna þingið var mótað með hliðsjón af þeim upplýsingum sem bárust á þessum fundum.
 
Ljósmyndir: Kristján Kristjánsson
Ráðgjafarfyrirtækið Alta annaðist framkvæmd þingsins, undirbúning og úrvinnslu og byggði þar á reynslu sinni af íbúaþingum sem haldin hafa verið í fjölmörgum sveitarfélögum undanfarin misseri. Eins og oft áður við umfangsmikil samráðsverkefni naut Alta fulltingis fyrirtækisins John Thompson og Partners í Bretlandi og sérfræðingur þeirra, Charles Campion, var í teymi Alta. Að auki hafði Alta sér til aðstoðar hóp arkitekta og skipulagsfræðinga til að stýra umræðu og aðstoða við greiningu.
Rétt er að taka fram að tveir fagmenn sem jafnframt eru í dómnefnd hugmyndasamkeppninnar aðstoðuðu aðeins á fyrstu stigum úrvinnslu en eiga ekki þátt í þeim hugmyndum og vangaveltum sem hér eru settar fram um skipulag miðbæjar eða komu fram í kynningu niðurstaðna. Einn arkitekt gaf fyrirfram til kynna áhuga á þátttöku í hugmyndasamkeppninni og tók því engan þátt í úrvinnslu eftir að starfi á opnum vettvangi lauk enda teljast þátttakendur í úrvinnslu vanhæfir til keppni. Kynningarstarf fyrir þingið
Stefnt var að þátttöku a.m.k. 500 einstaklinga í opna samráðsþinginu. Til að ná þeim fjölda var gerð kynningaráætlun sem tilgreindi helstu þætti kynningarstarfsins ásamt áætluðum kostnaði.
Helstu þættir kynningarstarfsins voru auglýsingar í prentmiðlum, aðallega svæðisbundnum en líka blöðum með landsdreifingu, auglýsingar í sjónvarpsstöðinni Aksjón, kynningarbæklingur sem dreift var inn á öll heimili á Akureyri og vefur verkefnisins sem stöðugt flutti fregnir af framgangi þess og tók við ábendingum frá áhugasömum. Þá voru send bréf til ákveðins hóps hagsmunaaðila, nærliggjandi sveitarfélaga og opinberra stofnana á svæðinu.
Önnur kynningarstarfsemi sem ekki fólst í greiddri birtingu var mjög öflug og hefur sennilega skilað jafn miklum árangri og sýnileika og greiddar auglýsingar. Stærstu þættir í þessu sambandi voru viðtöl í útvarpi og sjónvarpi, ítrekaðar fréttatilkynningar í dagblöðum, innsendar greinar í Morgunblaðið, umfjöllun um verkefnið á miðopnu Morgunblaðsins og starf stýrihópsfélaga á vettvangi sinna fyrirtækja og víðar. Hér ber einnig að nefna þátttöku bæjarfulltrúa í að kynna þingið daginn fyrir þing og tengil á vefsíðu Akureyrarbæjar.
Óbein kynning fólst einnig í þeim veitingum sem boðið var uppá á þingstað allan daginn. Það er ekki vafi að slíkt hefur aðdráttarafl og hefur orðið til þess að fleiri gestir mættu á staðinn.
Fyrirkomulag opna þingsins
Opna þingið var haldið í Íþróttamiðstöðinni laugardaginn 18. september og stóð frá klukkan 09:45 til 16:00. Við setningu þingsins léku blásarar frá Tónlistarskólanum á Akureyri.
Að loknum tónlistarflutningi setti fulltrúi Akureyrar í öndvegi, Hilmar Ágústsson þingið og bauð gesti velkomna. Hilmar lagði út af mikilvægi þingsins og þátttöku bæjarbúa við mótun bæjarins.
„Framtíð Akureyrar og nágrennis er undir okkur komin, sem
byggjum þetta svæði,
okkar framsýni, hugviti og framkvæmd”
Á þinginu var þátttakendum skipt í hópa og er gerð nánari grein fyrir niðurstöðum hvers hóps á þessum vef undir kaflanum "Hópar".
Á þinginu var norðlenskum matvælafyrirtækjum boðið að kynna framleiðslu sína og var það þátttakendum kærkomin næring meðan á þingstörfum stóð.
Tölur um þátttöku
Þátttakendur voru beðnir um að gera grein fyrir búsetu sinni á sérstökum þátttökuseðli en þannig fékkst einnig heildarfjöldi þátttakenda.
 
Um 93% þáttakenda voru búsettir á Akureyri, 3% í Eyjafirði utan Akureyrar, önnur 3% á höfuðborgarsvæðinu og færri af öðrum svæðum. Heildarfjöldi þátttakenda var 1450 manns.
Stærstur hluti þátttakenda var á aldursbilinu 41-60 ára, eða 41%. Hlutfall karla og kvenna var nánast jafnt. Úrvinnsla og kynning niðurstaðna
Úrvinnsla Alta hófst strax að þingi loknu á laugardagskvöldinu og var henni haldið áfram fram að kynningu á miðvikudagskvöldi. Markmið úrvinnslunnar var að draga fram meginskilaboð í þeim upplýsingum sem fram komu á þinginu og fá þannig fram þá sýn sem bæjarbúar hafa á framtíð og þróun Akureyrarbæjar. Þessi sýn myndar síðan forsendur hugmyndasamkeppninnar þar sem arkitektum og öðrum áhugasömum er boðið að útfæra nánar hugmyndir bæjarbúa.
Miðvikudagskvöldið 22. september voru niðurstöður kynntar í máli og myndum í Hólum, sal Menntaskólans á Akureyri. Liðlega 300 gestir sóttu kynninguna. Sjónvarpsstöðin Aksjón tók kynninguna upp og hefur hún verið sýnd á sjónvarpsrás félagsins.
Aðsent efni og athugasemdir utan hópa
Nokkrir aðilar komu skriflegum lýsingum á hugmyndum sínum um miðbæ Akureyrar á framfæri við Alta. Efni þessara pistla verður ekki tíundað hér en þar er að finna ýmsar hugmyndir um útfærslu, forgangsröðun og framvindu í frekari þróun miðbæjar á Akureyri. Að mestu leyti reyndust hugmyndirnar sem settar voru fram með þessum hætti í samræmi við þau sjónarmið sem voru ríkjandi á þinginu og framlag höfunda þessara tillagna var tekið með í úrvinnsluna eins og aðrar upplýsingar sem söfnuðust á þinginu.
Ljóst er að höfundar þessara tillagna hafa lagt mikla vinnu í að lýsa þeim og er þeim þakkaður áhuginn og þátttakan.
|
