Ljósmyndir hér fyrir ofan:
Kristján Kristjánsson

Ágrip helstu niðurstaðna

Á þinginu kom glöggt fram að Akureyringum rennur til rifja hve mjög miðbænum hefur hnignað á undanförnum árum. Verslunum hefur fækkað og almennt þykir miðbærinn fremur óaðlaðandi, skuggsæll og vindasamur. Sú skoðun var ríkjandi að þessari þróun mætti snúa við með því að fjölga íbúðum í miðbænum og hafa þar matvöruverslun auk þess að gera hann grænni, skjólmeiri og litríkari. Þannig myndi þjónusta og mannlíf eflast og autt verslunar- og þjónustuhúsnæði fyllast á ný.

Undanfarið hefur nokkur umræða spunnist á Akureyri um byggingu háhýsa. Á þinginu voru skiptar skoðanir um ásættanlega hæð húsa en þó voru þeir töluvert fleiri sem töldu rétt að fara varlega í það að raska einstakri bæjarmynd Akureyrar með miklu hærri húsum en þeim sem fyrir eru. Ljóst er að Akureyringar telja Oddeyrartanga fýsilegan kost fyrir bryggjuhverfi. Þannig myndi Strandgatan tengjast miðbænum frekar, ekki síst eftir að fyrirhugað Menningarhús verður risið.

Fram kom á þinginu að Akureyringar vilja betri göngu- og hjólreiðaleiðir innanbæjar auk bættrar landslagsheildar milli miðbæjar og Brekkunnar. Óskir komu fram um að Skátagilið yrði skipulagt fyrir afþreyingu í grænu umhverfi í tengslum við miðbæinn. Almennt vilja Akureyringar að miðbærinn sé aðlaðandi vettvangur mannlífs og atburða. Vonir eru bundnar við að nýtt Menningarhús færi miðbænum aukið líf auk þess að glæða fjölþætta menningarstarfsemi. Að sama skapi mætti efla söfnin og starfsemi Punktsins enn frekar.

Málefni Akureyrarvallar, sem er aðalleikvangur bæjarins, hafa verið ofarlega á baugi enda liggur fyrir að taka þarf ákvörðun um framtíðaruppbyggingu íþróttasvæða á Akureyri, vegna fyrirhugaðs landsmóts 2009. Íþróttafélögin KA og Þór hafa lýst áhuga á að frekari uppbygging á þeirra svæðum taki við starfsemi vallarins, sem trúlega yrði þá lagður af. Á þinginu kom fram nokkuð almennur áhugi á því að þarna yrði áfram grænt svæði t.d. fjölskyldugarður en fleira var nefnt, t.d. verslanir og íbúðir. Svæðið er stórt og því mætti hafa þar margvíslega notkun.

Fleira var rætt á þinginu en skipulag í miðbænum. Við umræðu um atvinnumál komu fram óskir um að takast mætti að auka fjölbreytni í atvinnulífi, m.a. með því að laða stóran vinnustað að bænum og auka framboð á tæknimenntun á háskólastigi, jafnframt því að nýsköpun og frumkvöðlastarfsemi verði efld. Vonir eru bundnar við að ferðaþjónusta verði vaxandi þáttur í atvinnulífinu. Akureyringar eru ánægðir með skóla á öllum stigum en telja að efla mætti samstarf heimila og skóla og tengingu skólastarfs við íþrótta- og tómstundastarfsemi. Fram kom að efla þurfi þjónustu við aldraða.

Greinilegt er að Akureyringar kunna vel að meta þau umhverfisgæði sem þeir búa að, bæði í nágrenni bæjarins og í hinu byggða umhverfi innanbæjar. Í þessu er fólgin sérstaða sem ýtir undir hlutverk Akureyrar sem mótvægi við höfuðborgarsvæðið og skapar mörg sóknarfæri.

Margir Akureyringar telja bæinn sameina kosti smábæjar og borgar og kunna vel að meta öfluga mennta- og menningarstarfsemi og margvísleg náttúrugæði. Þessir þættir, ásamt bættum samgöngum við önnur svæði innanlands sem utan eru lykillinn að því að nýta fjölmörg sóknarfæri og setja Akureyri í öndvegi.
Á þinginu kom fram mjög jákvæð afstaða til þess frumkvæðis sem Akureyri í öndvegi sýnir og fögnuðu íbúar því að fá einstakt tækifæri til að taka þátt í að móta miðbæinn.